جزيرة الافاعي - البرازيل
في جولتنا انهارده حول العالم، هنروح مكان خطر جدا جد على حياتي وعلى حياتك (يعني فعلا متمناش اروحه ابدا)، يلا بينا نربط الاحزمة ونركب الطيارة، ونروح جزيرة إيلا دي كيمادا جراندي في البرازيل.
البرازيل، معروفة بأشهر وأعظم رؤوس الحربة على مستوى العالم في كرة القدم يعني روماريو ورونالدو الظاهرة وبيليه. كل راس حربة من دول كان بيقتل منافسيه بأهدافه وسحره البرازيلي. لكن البرازيل فيها راس حربة تاني قاتل بالسم.
جزيرة إيلا دي كيمادا جراندي: هي جزيرة الأفاعي، أو جزيرة الموت. وهي واحدة من أكتر الأماكن غرابة وخطورة في العالم. الجزيرة الصغيرة دي موجودة على بعد حوالي 33 كيلومتر من سواحل البرازيل في المحيط الأطلسي. الجزيرة دي معروفة إنها موطن لأخطر الثعابين في العالم. منهم نوع بيقولوا عليه راس حربة، التعابين دي لما تعض تقدر تحلل الأنسجة في وقت قياسي(انت متخيل). طيب تسألني سؤال مهم، كم عدد سكان الجزيرة دي؟ الرد واضح وقاطع، صفر. محدش يقدر يعيش فيها. يُقال إن في كل متر مربع بيعيش فيه تقريبا 5 تعابين. طبعا ممنوع دخول بشر للجزيرة دي إلا العلماء والباحثين اللي معاهم تصاريح.
في في حياتنا أصحاب بنبقى فاكرينهم جدعان وهوب يلدغوا لدغة فيها سم قاتل. ومن هنا بيطلعلنا شوية مصطلحات في مجتماعتنا زي (مفيش صاحب بيتصاحب) و (غدر الصحاب) و (الصحاب في أجازة).
عشان اكون امين معاك الكلام جزء منه حقيقي، ايوه في اصدقاء صحوبيتهم سم، لكن في أصدقاء تاني جدعان جدا، عشان كده بلاش نحبط نفسنا ونقول مفيش صاحب بيتصاحب.
في الكتاب المقدس بنلاقي نماذج كتير للصداقة والوفاء، زي قصة داود ويوناثان. داود، اللي كان مطارد من الملك شاول لقى في يوناثان، ابن الملك نفسه، صديق وأخ بمعنى الكلمة. يوناثان خاطر بحياته وبوضعه الاجتماعي علشان يحمي داود. يوناثان وداود بيعلمونا إن الصداقة الحقيقية ممكنة وموجودة، وإن الوفاء والتضحية جزء أساسي منها.
في النهاية احنا حكينا عن جزيرة الافاعي اللي في البرازيل، وشفنا إن محدش يقدر يعيش على الجزيرة دي، لكن شفنا إن في صداقة حقيقة في الكتاب المقدس في أمثال ١٧: ١٧ مكتوب
اَلصَّدِيقُ يُحِبُّ فِي كُلِّ وَقْتٍ. ولو لسه بتقول "مفيش صاحب بيتصاحب". يبقى لازم نكون إحنا البداية لتغيير القاعدة دي. نفتح قلوبنا ونكون أصحاب حقيقيين.
في أمثال ٢٧ :١٠ مكتوب لَا تَتْرُكْ صَدِيقَكَ وَصَدِيقَ أَبِيكَ. لازم نبدأ بنفسنا نساعد ونقف مع اصدقائنا في الضيق. ومن هنا، نقدر نبني مجتمع صحي أكتر. بس نصيحة بلاش تكتر أصدقائك.
والنصيحة الأهم بقى انك بلاش تسافر وتتغرب وتروح جزيرة الافاعي، لأنك أكيد مش هترجع تاني لو رحت هناك. يلا.. سلام. ونتقابل الحلقة الجاية في دولة جديدة ومكان جديد حول العالم.