متحف العلاقات المنكسرة - كرواتيا
في جولتنا انهارده حول العالم، هنروح مكان مميز في اوروبا (لو بتحب المغامرة يبقى لازم تزور المكان دا في يوم من الايام)، يلا بينا نركب الطيارة ونربط الاحزمة ، ونروح كرواتيا.
اول حاجة هتيجي في دماغك يا معلم لما تقول كرواتيا، هي مدينة دوبروفنيك (Dubrovnik) وهي المدينة الأشهر، ودي اتصور فيها المسلسل المشهور Game of Thrones . بص بقي المدينة دي هي مدينة مسورة، وبتعتبر واحدة من أكتر المدن جاذبية في كرواتيا، وهي مدرجة على قائمة التراث العالمي لليونسكو. انت تمشي على جدران المدينة وتستمتع بمناظر خلابة للمدينة والبحر. تقدر كمان في كرواتيا تروح سبليت ودي فيها قصر دقلديانوس ودا مجمع قصري ضخم اتبنى في القرن الرابع الميلادي، وبرضه هو مدرج في قائمة التراث العالمي لليونسكو. وفي اسبليت كمان تقدر تزور ريفا ودي واجهة بحرية مليانة بالحياة والمقاهي والمطاعم. ممكن كمان تزور في كرواتيا Plitvice Lakes National Park حديقة البحيرات الوطنية بليتفيتش، مكان مليان بحيرات زرقا صافية وشلالات خلابة. وبرضه المكان دا مدرج في قائمة التراث العالمي لليونسكو. لكن خلينا نروح مدينة زغرب اللي فيها متحف هناك تعالوا ندخل جواه.
متحف العلاقات المنكسرة: المتحف دا اللي عمله فنان وفنانة من كرواتيا كانوا بيحبوا بعض وانفصلوا فقرروا في سنة ٢٠٠٦ يعملوا المتحف دا، وسابه جواه كل حاجة ممكن تفكرهم ببعض. الفكرة كانت حلوة وهوبا عجبت صحابهم اللي دخلوا في علاقات فاشلة واضطروا يسيبوا هما كمان هدايا بتفكرهم بالطرف التاني. لحد ما بقى متحف رسمي في ٢٠١٠. بالمناسبة المتحف دا مليان دباديب ومناديل ورسومات وتذاكر سينما وتماثيل وهدايا كتيرة. الفكرة بقى انك بتسيب اللي بيفكرك من هدايا وتكتب جنبه قصة الهدية.
في حياتنا احنا محتاجين المتحف دا، محتاجين مكان واحنا متألمين نروح ونرمي فيه ألمنا ووجعنا وتعبنا.
في الكتاب المقدس في متى ١١ : ٢٨ مكتوب تَعَالَوْا إِلَيَّ يَا جَمِيعَ الْمُتْعَبِينَ وَالثَّقِيلِي الأَحْمَالِ، وَأَنَا أُرِيحُكُمْ.
الحقيقة إن الألم من الحاجات الصعبة جدا، وعارف إن مفيش وعظ ولا كلام ممكن يشفي الألم. لكن صدقني المكان الصح اللي تسيب فيه ألمك وحزنك وتعبك هو عند الله. أحيانا كلام الناس بيجرح ويألم أكتر. لكن صدقني الكلام مع الله بيشفي، لو اتعلمنا نسيب اوجاعنا وألمنا عند الله، ونصبر أعتقد شكل حياتنا هيختلف.
في النهاية من خلال محتف العلاقات الفاشلة اللي موجود في زغرب في كرواتيا وكمان من خلال الكتاب المقدس بنعرف حقيقة مهمة، إن الصبر واحنا بنمر بوقت الألم هو أمر خارق للطبيعة. الموضوع دا محتاج لعمل الله فينا، محتاج يكون عندنا ثقة الكاملة بالله. وخليني أقولك لو سمحت للصبر أنه ينمو جولك بدل الحزن والشكوى، فانت هتتغير وتكون شخص ناضج نفسيا وروحيا.
وعايز أقولك بدل ما تسافر لحد زغرب عشان تروح المتحف دا، تقدر وانت مكانك ترمي همومك وأحمالك عند ربنا بدون تكلفة ولا تذاكر سفر. يلا.. سلام. ونتقابل الحلقة الجاية في دولة جديدة ومكان جديد .. حول العالم.