كتاب ازاي اواجه خوفي
وكتابنا انهاردة هو
Feel the Fear and Do It Anyway – Susan Jeffers
الكتاب ده واحد من أكتر الكتب تأثيرا في موضوع التعامل مع الخوف، وخصوصا للشباب اللي دايما حاسس إنه مش جاهز كفاية أو ممكن يفشل
سوزان بتقول ببساطة
الخوف عمره ما بيختفي، لكن إنت اللي بتكبر، فبتتعامل معاه بشكل أقوى
الكتاب فيه ٥ أفكار الأساسية فعلا روعة
اول فكرة: كل الناس خايفة، حتى الناجحين
ساعات بنفكر إن الناس اللي بتنجح مش بتحس بخوف. العكس هو الصح. الناجحين اتعلموا إزاي ياخدوا خطوة رغم وجود الخوف. يعني الفرق مش في الشعور، لكن في القرار
تاني فكرة: الخوف الحقيقي هو إنك تحس إنك مش هتعرف تتصرف لو حصلت حاجة وحشة
يعني الخوف مش من الفشل في حد ذاته، لكن من شعورك إنك مش هتقدر تقوم بعده.
سوزان بتقول: لما تبدأ تصدّق إنك هتعرف تتعامل مع أي حاجة تحصل، ساعتها الخوف بيقل.
تالت فكرة: الطاقة اللي بتصرفها في القلق، ممكن تتحول لطاقة تغيير
لما تفضل تفكر في (ماذا لو؟)، بتستنزف طاقتك في الهوا. إنما لو وجهت التفكير ده لخطوات عملية – زي تحضير، تدريب، أو حتى صلاة – ده بيغير المعادلة تماما
رابع فكرة: غير صوتك الداخلي
بدل ما تقول لنفسك (أنا خايف، أكيد هفشل)، علم نفسك تقول
أنا متوتر بس ده طبيعي، وكل خطوة هاخدها هتعلمني
خامس فكرة: مفيش قرار صح ١٠٠%، بس في قرار تتعلم منه
واحدة من أكتر الحاجات اللي بتشلنا هي الخوف من إننا ناخد القرار الغلط. لكن الحقيقة إن مفيش قرار مش هيفيدك بطريقة أو بأخرى.
مثال عملي
تخيل إنك جالك عرض شغل في مجال جديد، وأنت حاسس إنك مش كفء
سوزان هتقولك
اتقبل الإحساس ده،
حضر نفسك كويس،
واعمل الحاجة وإنت خايف، بدل ما تستنى اليوم اللي مش هتبقى خايف فيه (لأنه مش جاي)
في النهاية انا شخصيا بحب اوي الايه اللي في رسالة تيموثاوس التانية ١ : ٧ اللي بتقول
لأَنَّ اللهَ لَمْ يُعْطِنَا رُوحَ الْفَشَلِ، بَلْ رُوحَ الْقُوَّةِ وَالْمَحَبَّةِ وَالنُّصْحِ
ربنا مش بيدينا روح الخوف، لكن قوة ومحبة وحكمة.
يعني حتى لو خايف، فحابب اشجعك واشجع نفسي الله يسندنا ويعدينا من اصعب الأوقات.