الجسر الذهبي في فيتنام
في جولتنا انهارده حول العالم، هنروح واحد من الأماكن المتميزة حول العالم، يلا بينا نركب الطيارة ونربط الاحزمة، ونروح فيتنام.
لما تروح فيتنام لازم تزور ٥ أماكن هناك، اول مكان العاصمة هانوي، ودي واحدة من أهم المدن التاريخية والثقافية في فيتنام.
كمان لازم تزور خليج هالونج، الخليج دا فيه جزر ومناظر طبيعية خلابة، وكهوف روعة وشواطئ تجنن.
كمان متنساش تروح، مدينة هوي آن. ودي واحدة من المدن التاريخية المهمة في فيتنام، لأن فيها معابد وقصور كتيرة اتبنت في وقت الإمبراطورية.
ممكن كمان تزور مرتفعات سابا، احلى مكان للناس اللي بتحب رياضة التجديف والمشي لمسافات طويلة، هتشوف مناظر طبيعية وجبال عملاقة، ومزارع خضرا.
أهم مكان لازم تزوره هو الجسر الذهبي، بيتصنف من اجمل الجسور حول العالم. الجسر دا طوله ١٥٠ متر وارتفاعه ١٤٠٠ متر فوق مستوي سطح البحر. المبهر في الجسر دا الشكل. ايدين كبيرة بترفع الجسر حواليك تلال من كل جانب، سما صافية وبحيرات زرقا ومساحات خضرا. اللي راحوا الجسر دا قالوا انهم حسوا انهم في الجنة حرفيا. في المكان داه تختبر المتعة، متعة وانت وسط الطبيعة والجمال، متعة وانت شايف ان في ايدين بتشيلك طول الوقت. دي هي المتعة الحقيقية.
في حياتنا بندور على المتعة، ودايما شايفين ان المتعة في الجنس والفلوس والسلطة. وحقيقي الحاجات دي ممتعة. بس متعة لحظية متعة ليها وقت. المتعة دي مش بس بتنتهي، دا كمان لو فقدتها بتحس باكتئاب.
المتعة الحقيقية اننا نرجع لربنا، المتعة اني استمتع بالعلاقة والكلام معاه. عايز اشجعك الله بيستمتع بالقعدة والكلام معاك، هو قال لذتي مع بني آدم. واحنا كمان متعتنا ولذتنا هتكون في العلاقة مع الله.
في الكتاب المقدس في مز 63 مكتوب يَا اَللهُ، إِلهِي أَنْتَ. إِلَيْكَ أُبَكِّرُ. عَطِشَتْ إِلَيْكَ نَفْسِي، يَشْتَاقُ إِلَيْكَ جَسَدِي فِي أَرْضٍ نَاشِفَةٍ وَيَابِسَةٍ بِلاَ مَاءٍ.
مشكلتنا اننا مش بنهتم بعلاقتنا بالله، المشكلة اننا بنستسلم اننا نعيش وسط عالم زحمة ومزعج ومش بنفكر ندخل منطقة الصمت اللي من خلالها تقوى علاقتنا بالله.
في النهاية احنا اتكلمنا عن فيتنام وعن الجسر الذهبي، وعرفنا إن المتعة الحقيقية في العلاقة والتواصل مع الله، بشجعك تستمع ،تمتع قلب الله بيك، وكمان تستمتع بالحاجات البسيطة والصغيرة اللي حواليك.